Jam 5 | MCQ | STEP | 'Enakúne ja ea ka'ene uneunecha rukima'urakije sisea ka'ene joni haha 'ahi re'i venujihuna'e iviamaa roe niramarume 'ee úchia eha.

James 5

Kukua Rukinijihuni Jujuvu'a

1 'Enakúne ja ea ka'ene uneunecha rukima'urakije sisea ka'ene joni haha 'ahi re'i venujihuna'e iviamaa roe niramarume 'ee úchia eha. 2 Joni kukua uneunechijija sakarasa raname 'ee joni ateha tiriapo uhusa ranavara. 3 Joni korutia 'ee siriva tihejara. 'Ene ijí tiheja kajipo ja rone 'warahuna. 'Ene ijipo veje ja areri veni renau ja'ina'e renahuna. Ike vea túchamaa ikino ja joni uneunecha hine tamua vejara. 4 Heha! Ea ka'ene oni juara meja jihipuni eha ka'ene a pavaji'i 'uninamie hinujihuna'e pu ninama'e hine 'umeju. 'Ene ea ka'ene juara savajipo hine emavajujaho ajime Natohwa Sapaoti ka'ene uneunecha maho'o 'Ajohi'ini jihuni ataa vaji arumu. 5 'Enakaivo ja ikino mwe'i hijujaho uneunecha mamaa 'ee mapoka ani renavumakame ijihuni toi hami hine 'ee joni hiijaho joni hahijara ura renaja'ina'e veji'i hijara. 'Ene ijihuni vei reje 'anihuni jihuna'e joni oja siseiji piravume emarejara. 6 Ja ea arimaa ka'ene ja patanu'urihujaho namahe 'ee 'anaume kwamana.

'Unama Ichá'ina Masuani Hine 'Ee Siporua 'Ohunijina

7 'Enajihuna'e vwehu nune masuani ajuarasahe hina va'eje Natohwijaho ro'amana. Ea ka'ene juara 'oji'inijara huni uja mavarasa'ina ka'ene mwe'a vaji irechavu'e navujipo nehi pine sona'eje marasa'avarono masuani 'ajiha hinujaho kaha. 8 Ja 'u'o masuani ajuarasahe joni oja veje harura rena'amana. Ijihuni maijaho Natohwijara rohuna nituranu. 9 'Enakúne vwehu nune pasu'arame ninakara'avara. 'Ejakame ja panama'avara. Heha! 'Otua heji'inijaho vwicha jiamai naminu. 10 Vwehu nune areri poropetiepo Natohwi jihuni iha toi vejaja'ina'e siseisei hi'avajaho masuani ajuarasahe pura vene najaha kaja'ina'e hi'avara. 11 Heha! Ea ka'ene kirasahe va'ujija nú punijihuna'e teamanuhuna. Jopura kirane va'ajaho ja nihejura. 'Ene túna'i roe ichá'ina ka'ene Natohwijara venajaho nikavara. Natohwijaho niho'o temuki rareji'ine 'ee numisarai rareji'ina. 12 'Enavo vwehu nune ni'ima'urijaho akúpa 'ee mwe'a ho unenu'u pina pa'urahi'i ichutoa piki'avara. 'Enakaivo i'a 'i'i ve'avajaho i'a 'iame 'ee pana 'i'i ve'avajaho pana 'i'avara. 'E'irakúne ja 'otua vaja panami'avara. 13 'Ú ja ea pina joni vaja ahijiji'i vi hino? Hu maka'eje siporua 'o'amana. 'Ene ea irara oja sonama para'eje hi'amajaho maka'eje javaa ka'ene Godi ta'arohujaho veji'i hinama. 14 'Ú joni vaja vi ea pina atami 'una'eju'e hino? Ijinakú maka'eje sosi huni eruta'e 'warave roa 'ee maki'eje pu huni siporua 'onaha 'ee Natohwi jihuni iha toi 'werua 'onaha. 15 'Ene siporua ka'ene nimaa roji'i 'ojujara reje ea ka'ene atami 'unamujaho marahuna. 'Ene Natohwijara veje 'urihuna. 'Ene hu sisea venana'e re'amajaho huni sisea vwihane areve pa'arehuna. 16 Ijihuni hahi joni sisea 'wame nahati'ara'avara. 'Ene ni'ajarame siporua 'ojakame ja marani'amana. Ea ka'ene arimai jihuni siporuijaho harura rukima'ure 'ee maaru reji'ina. 17 Iraijaho emaa 'ee huni kara ijaho núnija'ina kaivo hu siporua nimaa nimaijino neha papi'amarono 'ojume mwe'a neha papi'eme juara no'opisune 'ee masapa iropune kwinu pa'arejara. 18 'Ejume hu kú'o siporua 'ojume ichutoa neha roe pijume mwe'a 'iruma marasahara. 19 'Ene vwehu nune ei pini joni vaja kajino 'unama nimaiji are'ika'i va'amajaho ei pini va'e ahema apene ro'amana. 20 Maka'eje ea kajaho hena ka'amana. Ea irara ea ka'ene sisea veji'iniji 'waravu'e huni 'unama sisei jihuniji aremujaho hu huni 'avena ka'ene kwahuni 'unamiji va'ajaho ni'ajahana. 'Ene huni sisea mapokijaho vahamana.